என் பார்வையில்..

எதையும் மறக்கவில்லையோ? நினைப்பதில்லை என்பது உறுதி மறக்கவில்லையா எனக் கேட்டால் தெரியவில்லை ஒரு வேளை அது சரியாகக் கூட இருக்கலாம் இன்னும் தொலைத்திடாமல்தான் இருக்கிறேன்  என்னை

கடைசி பேருந்தும் கைவிட்டுப் போன நீண்ட இடைவெளிக்குப் பிறகு மழை வந்து சேர்ந்தது எல்லாமும் மறந்தது  விட்டுச் செல்வதைப் போலவே ஏந்திக் கொள்ளவும் ஏதோ ஒன்று இருக்கிறது 

என்னவாய் இருக்கிறேன் நான் உனக்கு? நான் நானாய் இருப்பதற்கான நிபந்தனையற்ற ஆதரவாய் இருக்கிறாய்!

உயரியதெனக் கருதப்படும்  ஓர் விருது  கிடைத்திருக்கிறது இழைத்த  எண்ணிலடங்கா குற்றங்களின் நிர்வாணத்தை இனி  நிம்மதியாக மூடி மறைத்துக் கொள்வேன்

சிறகொடிந்து மழைச் சாலையின் ஈரத்தில் வீழ்ந்து கிடந்த ஓர் தட்டானை மிதித்து விட்டேன் அதன்  விழிகளில் வழிந்தது நன்றியா? சாபமா?

நீங்கள் நினைக்கிறீர்கள் காறி உமிழும்  கண்டதையும்  அன்பென நான் சொல்கிறேன் சகதியில் சிக்கிய பழைய சங்கதிகள் அவை

தூக்கத்தில்  சிரிக்கும் குழந்தையைக் கனவில் தேவதைகளோடு பேசுகிறாள்  என்கிறாள் பாட்டி  எனக்கென்னவோ யாரோ  தேவதையிடம் பேசுவது  போலிருக்கிறது