Friday, April 9, 2021

குழந்தைமை

சிக்னலில் ஒரு குழந்தை
உற்றுப் பார்க்கிறது
அதன் கண்களில்
என்னவாக தெரிவேன்

நடமாடும் மரமாக
கருத்த வானமாக
நிமிர்ந்து நிற்கும் பூனையாக
கண்ணாடி அணிந்த பொம்மையாக
வண்டியோட்டும் சொப்பு சாமானமாக
புவா சாப்பிடாவிட்டால் கடத்தி
போய்விடும் பூச்சாண்டியாக

பெரிய மனிதன் வேடம்
பூண்டிருப்பவனுக்கு
அந்த உலகத்தில்
இடமே இல்லை

கண்களை விரித்து
புருவத்தை உயர்த்தி
கன்னத்தை உப்பலாக்கி
கரத்தை அலையாக்கி
சட்டென புன்னகை சிந்தியது
மீண்டதென் குழந்தைமை

சிக்னல் விழுந்தது
வண்டி புறப்பட்டது

கார்த்திக் பிரகாசம்...

Wednesday, April 7, 2021

வியர்வையின் ருசி

அனல் தகிக்க
நீ
சமைத்த
பண்டங்களுக்கு
உன் வியர்வையின் ருசி

கார்த்திக் பிரகாசம்...

Saturday, April 3, 2021

அப்பா என்ற ஓர் பதம்

நண்பனின் அப்பா இறந்துவிட்டார்
கைகள் நடுங்குகின்றன
குழிக்குள் சிக்கியதாய் தொண்டை
நகர முடியாமல் திணறக்
கண்கள் குளமாகின்றன
உள் வாங்கிய மூச்சு
உள்ளுக்குள்ளே ‌அடைப்பதால்
சுவாசிக்கச் சிரமமாய் இருக்கிறது
அவரை‌ பார்த்ததில்லை
அவரிடம் பேசியதில்லை
நொடியேனும் பழகியதில்லை
ஆனாலும் இத்தனைக்கும் காரணம்
'அப்பா'‌ என்ற ஓர்
பதமே

கார்த்திக் பிரகாசம்...

Thursday, April 1, 2021

பிசகு

நெத்தியில் பட்டையும் 
கழுத்தில் கொட்டையுமாய்
காலத்தில்
திரிந்தவன் இவன்
பக்தியோ பம்மாத்தோ
அர்த்த மறியாதவற்றின்
அர்த்தங்களை
அன்றைக்கொன்றாய்
அடுக்கிவைத்து
உலவிய நாட்கள்
தெரியாததையெல்லாம்
விருப்பமில்லையென வெறுத்து
ஏமாற்றிக் கொண்ட
பகுத்தறியும் பக்குவமில்லா
பொழுதுகள்
பின்னான சிதைவுகளில்
கண்களைச் சிமிட்டி
சாட்டையை சுழட்டி
காலமாடிய கள ஆட்டத்தில்
புரிந்தது
பிடிமானமென
நினைத்ததெல்லாம்
பிசகு

கார்த்திக் பிரகாசம்...

Tuesday, March 30, 2021

வறண்ட வாசம்

என்ன விழைந்தாலும் 
'எனக்கொரு கவிதை லாபம்' எனப்
புட்டம் புதையப்
புத்தகத்தை முறைத்தவாறு
அமர்ந்துவிடுவாய்
புசித்துப் போட்ட மாமிச துண்டாய்
இழவு வாசம் புகையும்
இருண்ட வீட்டில்
இரவுக் கஞ்சிக்குக் காய்ந்த வயிற்றுடன்
சுருண்டு கிடக்கும்
எங்களைப் பற்றி உனக்கென்ன கவலை
புருஷ ஜென்மமே
பேனா மசி காகிதத்தை நிறைக்கும்
வயிற்றை நிறைக்குமா
வார்த்தைகளைப் புசித்தால்
பசி தீர்ந்திடுமா
எழுது
இதையும் எழுதித் தள்ளு
சிறந்த கவிஞன் பதக்கம் வாங்கி
மார்பில் குத்திக் கொள்
முலாம் பூசிய பதக்கத்தின்
மறுபக்கம் வீசிடும் பார்
காய்ந்த வயிற்றின் வறண்ட வாசம்

கார்த்திக் பிரகாசம்...

Saturday, March 27, 2021

விற்பனைக்கல்லாத

ஒரு சில
கவிதைகளை
எண்பது ரூபாய்க்கு விற்றேன்

காய்ந்த வயிற்றைக்
கவிதை விற்ற காசு
காப்பாற்றியது

விற்பனைக்கல்லாத
ஒரு கவிதையை
உடனடியாக
எழுதிடப் போகிறேன்
இப்போது

கார்த்திக் பிரகாசம்...

Monday, March 22, 2021

வருமானம்

கம்மங்கூழ் மோர் விற்கும்
வயதான பாட்டிக்கு
வருமானம் என்பதெல்லாம்
நரை கூச்செறிய தழுவும்
கலப்படமற்ற
மரத்தடி நிழல் காற்றும்
வழிப்போக்கனின்
கனிவான
வார்த்தைகளுமே

கார்த்திக் பிரகாசம்...

குழந்தைமை

சிக்னலில் ஒரு குழந்தை உற்றுப் பார்க்கிறது அதன் கண்களில் என்னவாக தெரிவேன் நடமாடும் மரமாக கருத்த வானமாக நிமிர்ந்து நிற்கும் பூனையாக கண்ணாடி அண...