என் பார்வையில்..

சிறு வயதிலிருந்தே  கண்ணில் தென்படுவது காலில் உதைபடுவதென எல்லாமும் நீலம் மிகவும் பிடித்தமான நிறம் நீலம்  பிடிக்கக்  காரணமென்று நினைவடுக்கில் பதிவெங்கும் இல்லை ஆனால் இதர இத்யாதிகள் பிடிப்பதற்கு  நீலம் ஒன்றே போதுமான காரணம் ஒரேயொரு விலக்கு நீல நிறத்திற்காகக் கிருஷ்ணரைப் பிடித்திருந்தது அம்பேத்கரை  அறிந்திடும் வரையில்

சவுகரியமாக நிகழ்ந்தேறியது ஒரு மரணம்  என் கரங்களில் யுகமாய் எனக்காகவே காத்து தவித்திருந்ததை  போல

நனைந்து கொண்டே  பறக்கும் பறவை  மழையில் நீச்சல்  பழகுகிறது 

தாஜ்மகாலுக்கு முன் நின்று முத்தம் பகிரும் காதலர்களின்  படத்தைப் பார்த்தேன்  தாஜ்மகாலும் அவர்களை  பார்த்துக் கொண்டிருந்தது 

நண்பர்கள் தினத்தன்று  சந்திக்க வரவில்லையென அழுது‌‌ தீர்த்த நாள்  நினைவிருக்கிறதா?  அன்று பெய்த மழையில் இன்றுவரை நனைகிறேன் 

ஒவ்வொரு நாளும்   பழையதையெல்லாம் கழித்துவிட்டு கண்ணுக்குத் தென்படும் யாவையும்  புதியவற்றால் நிரப்பிடுவான் அவன் இல்லையேல் குறைந்தபட்சம்  இருந்த இடத்திலிருந்து மாற்றி  வேறொரு இடத்திற்குள்ளாவது   புகுத்திவிடுவான்   காலத்துக்கேற்ப  புதியதாக மறுக்கும்  அவனது சுயத்தை அம்மணமாக்கவே  இந்த ஏற்பாடு

இறுதிச்சடங்கு  உடல் அடக்கம்  உடல் தகனம்  வரி கிடையாது  ஏழை மக்களின் வலியறிந்த  அரசின் கரிசனம்   இனி  சாகும் நாள் குறிப்பது மட்டுமே  ஒரே வேலை  அதையும் அரசே செய்து  முடிக்கும்

நன்கறிந்த நண்பனுடன் விவாதம் விவாத மூர்க்கம் ஒருபுறம் கருத்தியல் கலகம் மற்றொருபுறம் மய்ய சரடிலிருந்து விலகி வாதம் வென்றிடும் முனைப்பில் அவனது குறைகளையெல்லாம் பட்டியலிட்டு  அவன் கால்களை உடைத்தேன் பதிலுக்கு எனது குறைகளைக் குறிப்பிட்டு என் மூக்கை உடைத்தான்  மாறி‌ மாறி குத்தி குருதிச் சொட்டச் சொட்ட மூன்றாம் நபர் தலையிட்டு வாதத்தை முடித்திடும் போதுதான் இருவருக்குமே உரைத்தது நண்பர்கள் நாங்கள்