தோற்றவன்

கனவில்
ஓர் பாராட்டு விழா
தோற்றவர்களெல்லாம் மேடையில்
வீற்றிருக்கிறார்கள்
ஒன்றிலும் ஜெயித்தவர் ஒருவர் கூட
இல்லை
அரங்கத்தில்
இதுவரையில் பலமுறை தோற்றவர்களும்
உடனடியாக தோற்கயிருப்பவர்களும்
வரிசை வரிசையாக
அமர்ந்திருக்கின்றனர்
ஆனால் எப்படி எல்லாரும்
சிரித்துக் கொண்டிருக்கிறார்கள்
எவருடைய முகத்திலும்
துளிக்கும் கவலை இல்லை
எனக்கோ ஆச்சர்யம்
தோற்ற பிறகு வருத்தமில்லாமல்
உங்களால் எப்படி
சிரிக்க முடிகின்றது
கேட்டே விட்டேன்
அதற்கும் அவர் சிரித்தார்
நண்பா..!
நாங்கள் தோற்றுவிட்டோம்
உண்மை தான்
ஆனால் நாங்கள்
முயற்சிக்கிறோம்
தொடர்ந்து முயற்சிப்போம்
வெற்றியோர் அனுபவம்
முயற்சியோர் வழிமுறை
தோல்வியே பாடம்
நாங்கள் பாடம் கற்கிறோம்
மறுபடியும் புன்னகை
அப்போது தான்
முகத்தைப் பார்த்தேன்
அது என் முகம்
உற்று நோக்கினால்
அரங்கம் முழுவதும்
என் முகங்களே

கார்த்திக் பிரகாசம்...