உதிர்ந்த நாட்கள்

பேய்க் கிணற்றில் வளர்ந்து நிற்கும் பிரம்மாண்ட பங்களா
பால்யகாலத்தைப் பயமுறுத்துகிறது

அண்ணாச்சி கடை இடத்தில் சூப்பர் மார்க்கெட்
கடனோ கருவேப்பிலை கொத்தமல்லி இனாமோ
கொடுக்கப்படுவதில்லை அந்த ஏசிப் போட்ட கடையில்
பத்து ரூபாய்க்கும் கார்டு மெஷின் ஸ்வைப்
சில்லறைக்குப் பதிலாக ஆசை சாக்லேட்டுக்கெல்லாம்
வாய்ப்பில்லை அங்கு

கூரைக் கடை பாட்டியிடம் நாலணா எட்டணாவிற்கு
இட்லி வாங்கிச் சாப்பிட்ட தலைமுறை
பால்யத்தின் பழைய சங்கதி

செட்டியார் பள்ளிக்கூடம் இன்னும்
பெயர் மாற்றாமல் இருப்பதில் புரியும்
சமூகத்தின் பொதுப் புத்தி

கடல் உள்வாங்கி காலியான இடத்தில்
மீன்கள் விற்கும் அக்காக்கள்
செத்த மீனின் செதில்கள்

குளத்தின் மேல்
அடுத்த வீடு தெரியாமல்
உயர்ந்து போன கட்டிடங்களில்
மறைந்து போன பக்கத்து வீட்டு
நலம் விசாரிப்புகள்

வாசல் இல்லாத வீடுகளில்
உறவினர்களின் வருகையை அறிவிக்க
காக்கைகள் வருவதில்லை
கார்ப்பரேஷன் தண்ணியும் வருவதில்லை

வளர்ச்சியின் சக்கரங்களில் சொட்டு சொட்டாய்
வீதியெங்கும் வழியும் பால்ய காலத்தின்
பால் மணம் வீசும் குருதியைச்
சகிக்க முடியவில்லை

கார்த்திக் பிரகாசம்...