ஒரே கனவு

அவள் உறங்கியதும்
ஏற்கனவே திட்டமிட்டபடி

அவளின் கனவிற்குள் சென்றேன்
கனவிலும் நான் பார்த்திடாத
உலகமாக அது இருந்தது
அங்கு ஒரே ஒரு மனித உயிர்
அது அவள் மட்டும் தான்
பதுங்கு குழிக்குள்ளிருந்து
பாம்புகளும் முதலைகளும்
ராட்சத பல்லிகளும் துரத்துகின்றன
முகங்களற்ற உடல்களற்ற
வெறும் கரங்கள்
அவளது உடலில் ஊற
நீள்கின்றன
கரப்பான் பூச்சியின் கண்கள்
கத்திகளை வீசுகின்றன
பெரும் ஓலத்துடன்
விழுந்தடித்து ஓடுகிறாள்
காப்பாற்ற பின்னாடியே நானும் ஓடுகிறேன்
தடுமாறி விழுந்த குழிக்குள்
ஐந்து தலைகளுடன் சிவப்பு எறும்புகள்
பயத்தில் விழித்து வெளியேறிவிட்டேன்
நடுக்கத்தில் உடல் வியர்த்து
உள்ளாடைகள் நனைந்துவிட்டன
இத்தனை கொடூர கனவிலும்
பக்கத்தில் குழந்தை போல்
உறங்கிக் கொண்டிருக்கிறாள்
பெண்ணாய் இருப்பது கடினமென்றால்
பெண்ணில் அவளாய் இருப்பது
அதனிலும் கடினம்

கார்த்திக் பிரகாசம்...